Maainâspõrtt säämas
Maainâspõrtt säämas -haʹŋǩǩõõzz täävtõssân lij jåårǥlâʹtted Tarinatalo-speâllmättjempirrõõzz sääʹmǩiõlid da taʹrjjeed päärnaid da nuõrid õõutverddsaž vueiʹttemvuõđid oouʹdeed mäŋgglookkâmtääideez. Haʹŋǩǩõõzz veäkka vueiʹtet lââʹzzted sääʹmǩiõli digitaalʼlaž vuällamvuõđ da ravveed tõi jieʹllemviõkksažvuõđ di tuärjjeed sääʹmkulttuur da ǩiõllõutstõõzzi ouddnummuž. Digitaalʼlaž mättmateriaal vääʹnn lij leämmaž miârkteei vaʹǯǯtõs sääʹmǩiõli mättʼtõõzzâst, da Maainâspõrtt taʹrjjad motivõʹstti da vuârrvaaiktõõzzlaž čåuddmõõžž tän taʹrbbe.
Tarbb da tuâǥǥaž
Škooulniiʹǩǩi lookkâm- da ǩeeʹrjtemtääidai huânnʼnummuš di škooul åålǥpeäʹlnn šõddi media-âânnmõõžž da äʹrbbvuõđlaž mättʼtõõzz kõskk lie lââʹzztam taarb oouʹdeed määŋghämmsaž pedagooglaž mõõntõõllmõõžžid. Lij tuõttum, što speâllʼlaž mättjempirrõõzz pueʹree ǩeeʹrjtem-motivaatio da teeʹkst tääʹzz, mii tuärjjad še sääʹmǩiõli mättʼtõõzz ooudâs viikkmõõžž da oouʹdad tõi ââʹnnem škooulkonteeʹkstest. Sääʹmǩiõllsa škooulneeʹǩǩ äukkjâʹvve še digitaalʼlaž mättjempirrõõzzin, kook taʹrjjee sij ǩiõl da kulttuur lokku vaʹlddi mättjemsiiskõõzzid. Maainâspõrtt lij tuejjuum määŋgsuârggsaž õhttsažtuâjast tââʹv õllškoouli- da tuʹtǩǩeemjooukivuiʹm, da tõt lij juʹn vuäǯǯamnalla lääʹddǩiõllsaž version.
Õhttsažtuâjj
Haʹŋǩǩõõzz jååʹđat FT Outi Kallionpää Lappi universiteeʹttest. Projeeʹktest lie še mieʹldd professor Pigga Keskitalo Lappi universiteeʹttestt, Oulu universiteeʹtt INTERACT- da OASIS-tuʹtǩǩeemjoouk di Oulu ämmatõllškooul speâlloouʹdeemjuâǥǥas. Speâll čõõđ viikkmõõžž da pedagooglaž ââʹntemvuõđ puäʹđet teʹsttjed õhttsažtuâjast sääʹmškooulniiʹǩǩivuiʹm.
Teäggtummuš da täävtõõzz
Lappi kulttuurfondd teäggat haʹŋǩǩõõzz. Haʹŋǩǩõs tuärjjad ǩiõli tääʹssäärv, oouʹdad sääʹmǩiõli jieʹllemviõkksažvuõđ di taʹrjjad sääʹmpäärnaid ođđ da modeʹrnn mättjempirrõõzz. Haʹŋǩǩõõzz puäđõõzz ravvee sääʹmǩiõli mättʼtõõzz, tuärjjee digitaalʼlaž mättmateriaal oouʹdummuž da šõddee ođđ vuäittmõõžžid vaarvuâlaž ǩiõli jeälltummša.
